گورێن بکۆم واتەیا هندەک یان گەلەک کوشتییێن بێناڤ و هژمار ددەت و پەیوەندییەکا گەلەکا خورت یا ب جینوسایدێ ڤە هەی، چونکی ئەو هژمارا مەزن یا قوربانییان تەنی دشێن د گورێن بکۆم ژ لایێ بکەرێ جینوسایدێ ڤە بهێنە ڤەشارتن و بەرزەکرن.
گورێن بکۆم ژ لایێ زانستی، یاسایی و دۆکۆمینتکرنێ و بیردانکا جڤاکى ڤە “Collective Memory” بها و گرنگییەکا مەزن یا هەی و ب تایبەتی ژی بۆ هشیارکرنا ڕایا گشتی و جیهانیکرنا پرسا قوربانییان ژ بابەتەکێ لۆکالی بۆ مژارەکا نیڤدەولەتی.
بکارئینانا وێنە و ڤیدیویێن گورێن بکۆم د ڕاگەهاندنێ دا ڕولەکێ مەزن دبینن دزیندیکرنا بیردانکا جڤاکى دا لسەر ئاستێ ناڤخویی و جیهانى دا و بابەتەکێ گرنگە د زانستێن سیاسی، یاسایی و کۆمەڵناسى دا. دوکۆمێنتکرن د ڕاگەهاندنێ دا واتەیا ئەرشیفکرنێ ددەت و گڕێدای بیردانکا جڤاکی، ئانکو بیردانکا کۆمێ یە، و هەبوون و بەردەوامیا هەر نەتەوەیەکى یا گرێدای بیردانکا جڤاکى و مێژوویی یا وى نەتەوەیە.
گورێن بکۆم مژارەکا گەلەکا گەرم یا ڕاگەهاندنا جیهانی بوون ژ دەما ژناڤچوونا دەولەتا ئیراقێ ل سالا ٢٠٠٣ێ تا نها وژدانا ڕایا گشتی یا جیهانی ل سەر وێ هژمارا مەزن یا قوربانیێن کۆمکوژییا ئەنفالان و وان گورێن بێ هژمار بەردەوام هشیار هێلایە. لەوما ژی عیراق د ڕاگەهاندنا جیهانی دا هاتیە بناڤکرن بناڤێ “دەولەتا گورێن بکۆم”.
ئارمانجا سەرەکی یا ڤێ ڤەکولینێ ئەوە یایا ئایا مژارا گورێن بکۆم چەوا بوویە بابەتێ ڕاگەهاندنا جیهانی و چەوا کارتێکرن ل سەر ڕایا گشتی کریە و بوویە بەشەک گرنگ ژ بیردانکا جڤاکى و مێژوویى یا کوردان و چ کارتێکرن لسەر پرسا کوردی ب گشتی و پرسا ناساندنا جینوسایدێن ل دژێ گەلێ کورد هاتینە ئەنجامدان چییە و چەوا ئەڤ مژارە هاتیە زانستیکرن و نیڤدەولەتیکرن؟
ژ بو نڤیسینا ڤێ ڤەکولینێ کارێ کۆمکرنا راپورت و نڤێسینێن ڕاگەهاندنێن جیهانی هاتیە کرن و پاشی هاتینە شروڤەکرن و ڤەرێژا وان دێ ل ڤی کونفرەنسی هێتە پێشکێشکرن.
پەیڤێن گرنگ: گۆرێن بکۆم، جینوساید، ڕاگەهاندنا جیهانی، ڕایا گشتی، بیردانک و جڤاک.
